「Tree根」鍾樹根升呢做立法會議員後，為免分身不暇，辭咗東區區議會主席；呢個肥美空缺，自然惹嚟唔少人虎視眈眈，東區區議員林翠蓮都打過開口牌，話要入閘同民建聯黃建彬（圖）逐鹿。據知唔少當區區議員為免得罪民建聯，唔敢提名林翠蓮參選，結果噚日改選，咪只得黃建彬一個人報名選主席、最終自動當選。
黃建彬坐正後，佢原本嘅副主席空缺要喺兩個月後大會補選。據聞民建聯想繼續囊括正、副主席兩個位，或派龔栢祥出選，但呢次輪到工聯會有意見，有意派趙資強上陣爭凳仔，唔少地區中人都話，呢場同門攻伐好戲好睇咯。