近排港股走勢梅花間竹，一日好炒、一日唔好炒，強勢股喺升市回吐一日，通常之後嗰日就急升報仇，持貨大漲小回，總有斬獲。不過，市場又唔算特別興奮，就算資金加快流入港股，加埋美國聯儲局宣佈QE4取代年底到期嘅扭曲操作，亦唔見個市出現向上Re-rate情況，噚日QE4好消息浮上水面，恒指都要略回。
橫睇豎睇，市況唔似會好強勁，尤其當唔少好消息出盡之後，好友有機會鳴金收兵，加上周三嗰吓雞犬皆升，唔少股份單日升十個八個巴仙，更令晉佳覺得有升市水尾之感。嚟緊似應逢高減磅，尤其持有累積升幅大嘅高波幅股份，就更加要提高驚覺。
睇周線圖，恒指喺11月初出現9周RSI 77.9嘅中線超買狀況，回吐兩周後短線見底回升，9周RSI家重越70。
沽內房換航空石化股
須知9周RSI升到77.9，係09年至今第二高水平，只有QE2時嘅10月中先出現過更高。可見呢輪9周RSI高位要突破77.9、避免形成雙頂背馳嘅難度偏高，換言之，港股確有中線乏力、進入整固期嘅風險，尤其當周線圖出現近期第一支陰燭嘅話，就可以確認RSI雙頂背馳形勢，中線見頂機會增加。
睇番短線，同樣以9周RSI上升動力去量度，恒指最多升多三幾百點，尤其出面唔少人睇港股12月見22800至23000，短線見頂壓力恐防更大；至於下跌空間就唔細，少少哋有番11月上半個月，從高位回落1000點左右嘅跌市規模，分分鐘仲可以跌更多。就咁睇，恒指短線下跌空間會比上升空間大，持有指數成份股，值博率一般。
要避開喺調整浪重創嘅風險，首先就要陸續減持一批累積升幅大嘅高波幅股份，內房股算係相當高危，如果投資者怕升市持續會走寶嘅話，可買入估值低殘、基本因素開始好轉嘅股份，例如晉佳之前介紹嘅航空股同石化股板塊，組合就可以變成穩守突擊、可攻可守，冇壞！總之，各位家最好做定防風措施。
晉佳
本欄逢周一、三及五刊出