一向低調嘅南洋集團（212），噚日公佈委任咗44歲嘅榮康信做集團非執行董事，華華睇真啲，原來佢係集團大股東兼常務董事榮鴻慶嘅乖孫，亦係集團副常務董事榮智權位公子，咁董事會面咪三代同堂囉！
南洋集團主要經營紡織同房地產，另外又持有台灣上海商業儲蓄銀行。榮鴻慶係已故國家前副主席榮毅仁嘅堂細佬，亦係台灣上商儲蓄主席；佢個仔榮智權就係中信泰富（267）前主席榮智健嘅堂弟。
去到第三代嘅榮康信，喺上市公司層面少啲見，原來佢一直喺亞太區從事資訊科技同電訊業，有超過九年經驗，03年起出任台灣上商儲蓄董事。今次做南洋非執董，唔知係咪為接手家族企業做準備呢？雖然係一家親，但榮康信每年董事酬金唔算有特別優惠，每年14萬4千蚊咁大把啫。