周二英聯盃8強，阿仙奴喺全力出擊之下，作客乙組仔巴拉福特只能夠1:1逼和對手，最後仲輸埋12碼出局。難得8強得番車路士一支強隊，英聯盃無疑係阿仙奴破8季冠軍荒嘅最好機會；但佢哋竟然以咁難睇嘅方式斷送，睇怕今年又係得個桔！
我求大俠半夜睇到阿仙奴個陣都醒一醒，辛迪卡索拉同華美倫個個都踢正選，除咗阿迪達變咗做高基連之外，阿仙奴精銳盡出，矢志入4強咁款。睇番賽程，佢哋要到下周一先再有比賽，聯賽作客雷丁，今仗確係冇留力嘅需要；加埋好多強隊已喺英聯盃落馬，得番車仔叫做同級數，捧盃幾會大，難怪雲格少有咁用正選出戰。
華美倫英雄變罪人
不過，英乙第4嘅巴拉福特踢得有板有眼，仲喺16分鐘靠死球攻勢，由加利湯臣先開紀錄；多得謝雲奴半空門都射咗出界，主隊半場領先1:0。雲格之後撳掣，查馬克、路斯基同阿歷士張伯倫先後入替，攻到去88分鐘，終由隊長華美倫頭槌破網，追成1:1完場；加時互無紀錄，要靠12碼分勝負。
阿仙奴有辛迪卡索拉同查馬克射失，但門將施捷斯尼救番兩球，可是第5輪華美倫中柱，由英雄變罪人，阿仙奴輸2:3出局。睇番數據，原來巴拉福特係英格蘭嘅12碼王，連續9次射贏12碼，真係抵佢哋出線。同日另一場，阿士東維拉作客反勝諾域治4:1入4強。
被乙組仔踢出局，我估雲格都會覺羞恥，但佢竟然話：「未盡全力先至會覺得羞愧，而我覺得全隊已經很努力地戰鬥。」有冇搞錯！就係全力都輸，先至更應該慚愧！賽後英國博彩公司SkyBet將下一位被炒英超領隊賠率調整，雲格已經升溫至6倍，僅次雷丁嘅麥達莫同新特蘭嘅奧尼爾。
此外，英國報章《Metro》可能以為英聯盃有重賽踢，所以噚日起錯題：「Bantams wait as Arsenal are held（左巴拉福特還要等待，因為阿仙奴追平）」。外界估計因為呢場係夜波，報紙要趕埋版，所以犯咗呢個大錯。
