國際羽聯超級系列賽噚日喺深圳展開，首輪分組賽就爆大冷，上月小登科嘅世界「1哥」李宗偉喺男單A組1:2輸畀中國嘅杜鵬宇。對賽7次，首次輸畀鵬哥，宗偉話結婚大事勞心勞力，所以少咗練習，狀態到家都未「弗」番，噚晚仲宣佈因肌肉受傷，退出比賽。同組嘅香港代表胡贇2:1反勝泰國嘅保辛拿，如果今日再贏鵬哥就肯定入4強。