近日流傳有公司出通告，勒令員工下周五「世界末日」前完成晒手頭上工作、收好晒啲尾數先放工，因為大家都擔心，瑪雅人預言嘅世界末日會來臨。有末日，當然要有末日救世者，網民早前公投，選出長毛負責打救世人。
感激網民熱捧
高登同Sony近日舉行網上公投，逾1,100位網民選出各個界別嘅末日救世者。長毛以33％支持，榮膺政壇救世者，力壓排第二嘅學民思潮黃之鋒。長毛當然好感激網民熱捧，但仍然對唔能夠喺特惠生果金上、拯救70歲以上嘅老人家耿耿於懷，佢家嘅最大心願相信同唔少市民一樣，就係「打救」狼振英。點解要「打救」？聰明嘅讀者一定有答案。網民同時選出苦等政府發牌嘅魔童王維基，成為娛樂圈救世者。但最諷刺嘅係，七成人話唔信下周五係世界末日囉。