富咸禮拜一喺英超贏紐卡素2:1結束聯賽7場不勝走勢，前晚就輪到新特蘭發威。黑貓憑占士麥堅恩、史提芬費查同埋施斯隆各建一功，喺主場大勝雷丁3:0，終止聯賽4不勝之餘兼攞到自9月尾以來首場主場勝仗，而且仲喺聯賽榜由尾3彈上第15位，領隊奧尼爾總算可鬆一口氣。黑貓能止跌回升，真係要多謝用後踭入球靚波嘅史提芬費查，原本話佢足踝受傷會缺陣，點知最後都出現喺正選名單之上，即刻令主W由1.92倍落飛至臨場1.85倍。至於雷丁，佢哋除喺聯賽5連敗之外，賽前仲有中場古費利以個頭唔舒服而拒絕隨隊到光明球場比賽，睇嚟領隊麥達莫有排煩。