【電視風雲】有報道指政府有機會於明年3月立法會定下的死線前，發出免費電視牌照以平息民憤。被視為今屆《萬千星輝頒獎典禮2012》視帝黑馬獲高登仔力撐的馬國明表明支持發牌，更相信新電視台不會動搖無綫一哥地位，還可以激勵公司拍更好的劇集。無綫行政主席梁乃鵬亦表示作為市民支持發牌，不怕競爭。
無綫昨晚第二晚在將軍澳電視廣播城筵開158圍盆菜，招待1,900名職藝員。繼前晚無綫行政主席梁乃鵬上台發表「街口王」宣言指控王維基後，今日輪到集團總經理李寶安上台接力，解釋街口王由來：「王維基先生喺街口做咗個地盤、挖咗泥沙開咗檔嘢，挖晒啲年輕人走，所以叫街口王。」
在台下李寶安接受訪問時表示不是反對政府發新牌：「唔係怕競爭，只係要求政府搞清到底要發幾多個牌先適合，TVB嘅立場係據理力爭，合情、合理、合法。」他又舉例假如放多啲漁船出海捕魚大家都會話好，不過幾年後生態環境會變成怎樣就未知。梁乃鵬亦認為TVB不會驚：「TVB唔怕競爭，乜嘢都唔使驚。我都係市民都支持發牌，因為免費，但到底政策係點，要搞清楚。」
法拉效忠無綫
馬國明作為今屆無綫頒獎禮視帝黑馬、獲高登仔開欄目支持，他明確支持政府發新電視牌，他說：「我支持㗎，我亦相信TVB唔係唔支持，係想搞清件事，發牌對觀眾係好事，唔會影響TVB龍頭地位，仲會激發TVB拍更好嘅劇。TVB高層講過，唔使我再講，但多啲競爭者水準會好啲。」
對於獲高登仔支持，馬明表明平常心：「林峯會多啲fans舉牌，但祥仔（黎耀祥）、陳豪都有好多成熟fans，唔會喺條街追住你。」對於本報舉辦的視帝視后選舉，fans眾多的林峯領先，馬國明表示不覺自己輸蝕，每個頒獎禮都有自己制度，他稱早前於馬來西亞僥倖得獎，如果輸都不會輸不起，但他會投劉松仁一票。同場的陳法拉跟高層口徑一致，她說：「三月傳之嘛，到時發牌先知，我支持公司，所以啲股票都冇賣，做股東感覺好好。」
採訪：溫敏芝、卓寶花、王崇穎
攝影：林德雄
一人一票投蘋果【萬千星虧】，對撼 CCTVB 公投↓↓↓
http://tv-voting.appledaily.com/