【本報訊】昨日是2012年12月12日，亦是本世紀最後一個年月日相同的日子。一對情人兩度走在一起又分離，至早前女方突患乳癌，舊情人再主動要求復合，陪伴度過化療歲月，14年愛情考驗煉成兩人廝守終生，訂下婚盟。另有近700對新人也同樣藉這個特別日子共諧連理。
從事維修工作的梁偉基34歲，外型健碩黝黑，說話直腸直肚，回想過去一年愛妻與癌魔對抗，難忍男兒淚：「最難忘係佢做完手術好痛，但我幫佢唔到。如果可以嘅話，我想瞓喺度嘅係我。」
他與比他小兩歲的太太關敏儀相識於1998年，一度因性格不合而分開，續以「好朋友」的身份關心對方，兩年後復合，又因敏儀覺得「差緊啲嘢」而提出分手。但偉基仍關心舊愛，前女友到醫院檢查身體亦陪伴在側。
近700對新人舉行婚禮
「醫生同我講有乳癌，佢喺醫務所外，我已經即刻同佢講叫佢唔好理我」。敏儀無奈說，「我唔知自己捱唔捱得到，第時有冇能力生BB」。偉基未被嚇怕，更鼓勵她，「癌症都係一個病，個病好番就冇嘢」。
患難見真情，他們第三度復合。敏儀去年底完成切除左邊乳房手術，其後開始化療，偉基一直照料。昨日她穿起婚紗，流下幸福的淚水：「共富貴唔難，最難係共患難。咁多年嚟，佢做咗咁多嘢已經代表一切。」
只要情真，繁文縟節盡可拋諸腦後。黃先生與新婚妻子，昨日中午12時正歡天喜地入中環大會堂婚姻登記處。沒有婚紗禮服、沒有交換戒指，只有一紙婚書，和二人的幸福滿瀉的笑臉。太太穿上「我只吃飯不洗碗」的上衣，又「威迫」丈夫脫去外套，「我只洗碗不吃飯」的承諾隨即現形。
二人相識九年，笑謂選擇昨日成婚因「易記」，婚禮一切從簡，「最緊要互相尊重同相處，咩儀式唔係咁重要」。入境處指昨有696對新人在各婚姻登記處、特許禮拜場所或經婚姻監禮人舉行婚禮。
