之前講過「中國人是需要管」嘅成龍，再度發表極權謬論挑釁港人。佢接受內地傳媒《人物周刊》訪問時話，唔滿意香港變咗示威之都，「甚麼都罵，甚麼都遊行」，建議香港限制遊行，仲暗示以暴易暴係冇問題；原來佢除咗耍醉拳，更加愛極權，難怪政界中人不禁話，左王邵善波呢鋪要甘拜下風。
「用暴力對付一些暴力」
近年以擦中央鞋為樂嘅成龍喺訪問中話，香港已經變咗遊行之都，好多無理取鬧嘅遊行，有人無所事事、趁假期就遊行、有人鬧中國、又鬧領導人，繼而發表極權建議：「應該規定甚麼可以遊行，甚麼不能遊行」，擺明打壓香港遊行同集會自由。
點解佢當年又可以發起遊行反黑呢？成龍堅稱佢呢款遊行冇問題，即係佢放火就得、平民點燈就唔得？咦，點解咁似狼振英嘅？
成龍既然對政治現況咁不滿，點解唔去做議員？佢話議員要斯斯文文，爆粗話：「去你媽的，『打』能解決問題最好，又不能打，我受這個罪幹甚麼？」然後話自己最相信，「要用一種暴力的手法去對付一些暴力、不守規矩的人」，極權外原來仲好暴力。
有關謬論一出，網民群起大鬧佢無恥；不時搞遊行示威嘅工黨李卓人都話，估唔到有人會提出呢種極權建議，竟然連遊行都要管？查實睇番成龍今年8月曾經大讚中國家陣係五千年來最好時刻，可見呢個世界，沒有最無恥、只有更無恥。
成龍紅色硬膠錄
日前：
「現在香港變成遊行之都……罵中國，罵領導人，甚麼都罵，甚麼都遊行。應該規定甚麼可以遊行，甚麼不能遊行。」
「要用一種暴力的手法去對付一些暴力、不守規矩的人。」
「我不反對你是賊，這個世界有人的地方就有賊。」
今年8月：
「中國正在最好的時代，現今是五千年來最好幾年。」
2009年：
指香港和台灣因「太自由而很亂」，認為「中國人是要管的，否則便會為所欲為。」
資料來源：《蘋果》資料室
mailto:[email protected]