吳爽同莫言、王菀之一樣，都好討厭政治，所以今日唔講政治，講人家事。吳爽有位朋友叫CY，佢患咗先天性強迫說謊症，後天就接受過專業語言偽術特訓，所以一生人呃到唔少女人。不過紙包唔住火，最近俾佢老婆C奶揭發佢包二奶，CY最初唔認，後來證據確鑿，就砌詞狡辯。以下係佢哋嘅對話：
C奶：死佬，捨得返屋企喇咩？
CY：我明白你對我嘅一言一行有好高期望，首先，我必須承認自己喺處理女人嘅過程裏面確有疏忽之處，亦曾經交代不清，為此我再次向你鄭重道歉。
C奶：你包咗二奶咁耐，點解一直隱瞞我？
CY：回想起嚟，我雖然從無任何存心隱瞞嘅意圖，但係呢一點確實係一個疏忽。自從6月底，你同外母對嗰個女人提出各種嘅質疑，我係需要一段時間翻查我滾女嘅紀錄，好好回答你哋兩母女嘅問題。
C奶：咁點解我媽咪寄咗四封email畀你都唔回應？
CY：因為當時我嘅意識中，應該係盡快撇甩個女人。後來條女被我撇甩咗嘞，所以二奶已經唔存在。至於冇向外母申報，呢個係一個疏忽。
C奶：咁你覺得我哋係唔係應該離婚？
CY：好多豬朋狗友都有一個觀點我係同意嘅，包二奶本身唔係一個大問題，因為咁，我係冇動機去掩蓋。
C奶：家全世界都知你包二奶，你知唔知個醜字點寫？你求婚嘅時候仲發誓話自己冇第二個女人㗎！
CY：記憶中我冇講過話我冇包二奶。
C奶：你咁無賴嘅！你唔收返頭先句說話，我就同你離婚！
CY：你頭先係話我求婚嗰時話自己冇包二奶，所以我先咁答。我講嘅係求婚嗰時，我係喺結婚後同你講冇包二奶嘅。我講呢句話並唔係要逃避責任，而係就問題嘅範圍作出回覆。我重申我喺包二奶嘅問題上，我身為老公係責無旁貸嘅，我再次向你致歉。