多得狼振英，今年聖誕至hit口號肯定係「聖誕快落台」，查實呢句搞鬼得嚟又易上口嘅口號，係民主黨創意媒體部嘅得意之作。佢哋最近食住個勢，推出「CY聖誕快落台之暴走立法會」動畫，等大家宣洩吓不滿。
自嘲民主黨瘀事
八方喺度劇透一下。話說「開誠布公」嘅狼振英，去到立法會俾長毛掟蕉，但「返黎就郁」嘅曾鈺成挺身擋駕，激到民主黨鐵頭何紮紮跳，化身「憤怒鴿」，諗住用個鐵頭撞爆曾鈺成嘅保護罩，但佢再次爆頭而回；好在民主黨仲有最叻㩒掣嘅「一嚿雲」，最終由佢㩒掣，將曾鈺成同狼振英彈出立法會，大團圓結局。
短片查實旨在呼籲市民元旦上街，踢走大話英；為咗增加戲劇性，裏面用咗鐵頭何當年被打嘅豬頭相，以及黃碧雲投錯票嘅瘀事自嘲一番；相信為咗民主大業，佢哋都唔介意犧牲小我。八方問過民主黨創意媒體部部長羅健熙，佢希望嬉笑怒罵嘅方式，可以吸引更多市民關注事件。