狼英可能驚「我冇講過我冇僭建」呢個金句令大家唔夠喉，噚日佢重申「冇喺競選特首辯論環節上講過呢個說話」，令成件事添上一份偽術美，睇嚟佢做咗咁多年人（狼），都仲未參透乜嘢係Less is More.
正申請免費電視牌照嘅有線（1097）同城電（1137）噚日有異動，前者收報0.455元，飆升12%，較唐牛上周推介時目標還要高，有跟進嘅戰友可分段食糊。無線小生花旦開口撐發免費牌，兩股表現亦配合，睇嚟應該好事近。
恒指高位徘徊，部份績佳股更勝大市，主打網絡遊戲及應用軟件嘅金山軟件（3888）抽高5.4%，創今年收市新高，可趁調整吸納。金山第三季賺1.1億銀人民幣，按年增長44%，年度化市盈率12倍，以龍頭計非常合理，集團優勢在於現金流強勁，淨現金佔市值近四成；大股東雷軍揸旗嘅祖國人氣手機小米，最近更入股集團附屬，隨時有動作跟尾，再添炒味；金山噚日收報5.48元，戰友可候5.40元吸納，目標睇六字頭。
唐牛