市面上有唔少跟隨經濟周期起落嘅股份，逐漸改變一浪低過一浪嘅走勢，變為一浪高於一浪走勢，相信目前只係呢類股份進入新一輪升浪嘅初期，稍後會繼續大漲小回，因此每次調整，將成為入市機會。化工股、航空股及個別資源股，都出現呢種走勢，值得留意。
晉佳近排介紹過南航（1055）、俄鋁（486），同埋今年重覆提過嘅儀征化纖（1033），呢啲股份目前仍可以考慮買入，尤其對於目前仍然揸住內房股嘅朋友嚟講，更值得將部份資金換馬去落後經濟周期股份，之後分分鐘有第二轉執吓。
講番航空股，呢個行業本身係要求持有大量固定資產（飛機）先可以營運嘅行業，經營槓桿偏高，仲要受燃料成本影響大，所以本身係唔容易賺錢嘅行業，盈利往往大幅波動，不過，如果經濟出現復蘇，同時燃油成本唔急劇上升，盈利增幅就可以好驚人。
競爭力相對較強
呢種發展有機會喺明年出現，內地經濟有逐漸復蘇迹象，內地航空業嘅客運量本身已經穩步上揚，明年應該有更加唔錯嘅增長；至於人民幣持續升值，亦令美元債比重較多嘅航空股受惠。總括嚟講，明年成個局面偏向有利內地航空業發展，收入增長、成本受控，航空股2013年增長應該唔錯。
南航估值最殘，但係國航（753）基本因素比較好，本身佢有執行能力高強嘅國泰（293）做主要股東，同埋航線網絡比南航、東航（670）分佈得更平均，競爭力相對較強，但估值亦較高，國航2012年市賬率1.2倍，估值相對國際同業亦唔算平，相信係反映番內地客運需求持續上升嘅因素，但如果反映埋行業復蘇，市賬率回升到1.5倍都唔過份。
睇圖表，國航正正係晉佳所講，由一浪低於一浪，變為一浪高於一浪嘅走勢，噚日受制6元出現回吐，相信5.60元會有支持，可以考慮喺調整期間分段吸納，中線上望7元，即係以2011年3至8月形成嘅密集阻力區作目標價，明顯跌破周線圖保歷加通道中軸5.15元止蝕。
晉佳
本欄逢周一、三及五刊出