港產米芝蓮星級食肆添好運，由旺角廣華街一間小店做起，做到家有四間分店，都算係咁。老闆兼主廚「培哥」麥桂培噚日爆料，話明年會衝出香港，去新加坡開首間海外分店呀。
明年烏節路開舖
培哥早前搵到奧海城靚舖，心情靚到不得了，原來佢最近唔止忙搬舖，仲忙住搞新加坡分店。佢話，明年首季會喺新加坡購物熱點烏節路一個大型商場入面，開添好運第一間海外分店，為港增光。
今次係搵當地老友幫手一齊搞，唔會特登喺香港派員工過去做，香港總店下個月底就會由廣華街搬去奧海城商場。培哥話，地舖租金不停加，將來開舖都會揀商場舖。另外擁有「季季紅」酒樓嘅喜尚（8179），副線「家常便飯」亦將進駐奧海城。