無綫上次搞公投港姐爛尾，見過鬼未怕黑，今屆全民公投視帝、視后同最佳劇集；全台3,000位員工，亦可以參加一人一票選出我最喜愛男、女角色、飛躍進步等九個大獎。嘩，有成3,000位選民，都多過只有1,200人嘅特首選委會啦，呢一票都幾珍貴，點知有員工話唔想投票喎。事關張投票表格印晒佢哋嘅姓名同員工編號，擔心投咗票會俾人秋後算賬。
「選民」憂被秋後算賬
一般公平公正嘅選舉，當然係要不記名投票啦，好似立法會同區議會選舉咁，都唔會叫人喺選票上寫名啦，因為唔可以俾人追查到投咩票㗎嘛，否則就係廢票。
但無綫似乎唔係好知咩叫真正普選喎。有班無綫員工同八方報料，話佢哋收到張投票表格時O晒嘴，因為張張表格有晒佢哋嘅名同編號，質疑具名投票好有危機，假若佢哋投票嘅人選，唔係高層嗰杯茶，會唔會有手尾跟呢？據聞唔少員工為免添煩添亂，私下紛紛話唔投好過投；最終呢個有成3,000「選民」嘅選舉，投票率可能好低喎。
一聽到員工擔心被秋後算賬，無綫外事部副總監曾醒明就哈哈大笑，話員工似乎「諗多咗」。佢證實員工投票表格上有晒姓名同職員編號，解釋咁做只係因為會搞抽獎，投票員工有可能獲得價值六千蚊嘅足金金龍，藉此鼓勵更多人投票啫，叫員工切勿大驚小怪。怕且呢個秋後算賬「疑雲」，係時候叫cut。
mailto:[email protected]