恒隆地產（101）噚日突然出現高層人事變動，做咗26年嘅老臣子姚子賢辭職，即日起身，理由係「決定投放更多時間從事其私人事宜」，同董事局冇任何意見分歧咁話。
執董位置懸空
外界對姚子賢未必咁熟識，事關恒隆一向由老闆陳啟宗主持大局，公開場合一定係陳啟宗講嘢，前掌櫃吳士元未走嗰陣都有份講，佢2010年中走咗，國泰（293）前大班陳南祿來做董事總經理，都好少搶陳啟宗風頭。
姚子賢一直負責恒隆喺內地嘅項目工程，做咗幾十年，2010年2月升做執行董事。今年5月恒隆罕有大搞品牌廣告，姚子賢都有參演廣告，份量可想而知。
咁高層辭職，照理唔會話走就走，公司亦未有同時宣佈邊位接替佢個位。聽聞陳南祿喺內部通訊中亦話，項目建設部嘅新架構要遲啲公佈，睇來真係走得好趕喎。