柯家怡，21歲，港大護理學系三年級學生，參加新城市廣場微電影劇本創作比賽，在400份參賽作品中脫穎而出，進入最後三強。創作的劇本《LAST X'MAS》，真人真事改編，以她在中學時期，與一名男同學像霧又像花的愛情故事為創作藍本。由互生愛慕到因為應付公開試，錯過表白機會。沒有生離死別，更非驚天動地的愛情神話，小妮子說，只期望藉着光影，尋訪失去聯絡的初戀情人，找回未萌芽已失落了的愛情感覺。記者：呂麗嬋
「每個人嘅中學時代，可能都有一啲放唔低嘅感情。我係獨生女，細個屋企管教好嚴，唔贊成咁早拍拖。但中五直升中六嗰年，我卻遇上佢。我哋屋企住得好近，有時一齊放學，無所不談。我知道，我嘅他出現了。但嗰時大家都要應付公開試，互有好感，只差一步，始終沒有表白。做唔成情侶，畢業後各自升大學，再無聯絡。香港資訊咁發達，要搵其實唔難，但過咗去，始終攞唔出嗰份勇氣。
盼電影有完美結局
像這樣沒有萌芽嘅愛情，你我怕且都經歷過吧？幾個月前見到呢個比賽，主辦機構話勝出嘅劇本會拍成兩分鐘嘅微電影，可以喺戲院播放。嗰時我就諗，如果可以寫一個關於我同佢嘅故事，你話幾好？呢個就係我寫《「LAST X'MAS》嘅緣起。一男一女，畢業後各散東西，兩個人嘅十年約定，如果2012年12月21日，世界沒有末日，不如我哋就一聚，過一個只有我倆嘅聖誕，好唔好？
或者係一種彌補吧？我同佢同窗嗰兩年，經歷過兩個聖誕節，嗰時大家都好含蓄，陰差陽錯，各有各嘅朋友，聖誕從冇一齊過。現實嘅遺憾，喺電影入面，我希望有一個完滿嘅結局。
好多人都問我，喺大學讀護理，將來應該做護士，點解咁鍾意拍電影？唯一可以解釋嘅係：我真心相信，呢個係夢工場，所有現實中不能達成嘅夢想，喺呢度都可以變成真，或者呢個正係我迷上電影嘅原因吧？
喺大學三年，課餘做得最多嘅，係參與校園廣告同新聞嘅製作，又試過跟隨師兄師姐去片場做臨時演員，了解電影行業。
仲有一年，我就大學畢業，仍然為前途左思右想，做護士學以致用？定係入影圈闖闖，由零開始？今年，我喺醫院實習，睇到好多生離死別。我唔怕死，但我希望死之前，做自己好想做、但一直冇做嘅嘢。咁樣，就算世界末日，應該再冇遺憾。」