「Son姐：點解公司啲女人咁鍾意搞是非？同事與另一同事工作上的對話，啲女人可以一個唱一個和，究竟乜嘢心態呢？我跟同事仔傾過，他只係想好好地做嘢，唔想搞咁多嘢，明知人哋話佢，佢只好唔出聲，由得佢哋喎！我實在看不過眼，很想跟同事仔講要勇敢啲，唔理唔出聲係解決唔到問題的，人哋只當你小丑！但又怕教錯佢，同事仔情況會比家更差，有乜方法可以指點吓同事仔？」
這個題目真有趣！講真，把口生在那些八婆處（其實八婆並無性別之分，男兒身的八婆更惡頂！），要講甚麼誰管得着？或者，管來幹甚麼？即如你走在街上見有癲狗亂吠，你會走埋去了解一下嗎？你又會花時間學狗話和癲狗溝通嗎？除非你黐線，否則走為上着啦！打瘋狗針好痛又手尾長你知冇？
你間公司看來規模不小，否則哪有時間咁得閒唔使做日日圍埋講是非？不過我不只認同，還要讚賞你同事仔的做法，做人幾時都係EQ高才爬得高！駁嘴只會火上加油，令那些八婆更興奮更多話題，豈不正中下懷？千萬不能中計，因為癲狗是畜牲，冇性的，四圍亂吠終有一日吠到隔籬得罪其他人，自會有捉狗隊上門收拾。善惡到頭終有報，若然未報，只是時辰未到，稍安無躁！
沉默不是懦弱，忍耐不是麻木，你不是在為同事仔抱不平了嗎？惻隱之心人皆有之，見同事仔如此忍讓八婆還是咬着不放，我相信人同此心，暗地裏幫他一把的人不只是你。而且叫得同事仔他肯定年輕兼職位低，這正是最好的磨練。畀心機做，年紀輕輕如此忍得，假以時日打好基礎，到時候「發圍」肯定大把世界！
張慧敏
http://www.facebook.com/HKcareerdoctor