唔經唔覺，香港上市公司商會（CHKLC）已經成立十年，呢個星期四就會喺灣仔會展搞十周年晚宴，聽講財爺曾俊華、財經事務及庫務局局長陳家強、港交所（388）主席周松崗到時會畀面出席，幾位有份量嘅大孖沙亦可能現身。
後年主席換人
上市公司商會成立同發展都同港交所條例改動有關，十年前就係因為仙股事件，令到一堆二、三線股組織起來成立商會，方便同政府、監管機構溝通，當時已經有百間上市公司做會員。
08年底爆出董事禁售期事件，事態嚴重，就連藍籌股都參與埋一份，家商會有超過220個會員，大部份係上市公司，另外仲有律師、會計師事務所。有份擺平禁售期事件嘅鷹君（041）主席羅嘉瑞，亦由09年起，接替賭王阿仔何猷龍做商會主席，照計應該做埋明年就要換人。