經已6連敗嘅CBA球隊青島，周日作客衞冕嘅北京。麥基迪（T-Mac）雖然狂轟CBA個人新高37分，但係客隊都係以102:116敗走京城。最大鑊係打到第4節，呢位33歲前火箭球星俾對手吉喆挑釁後，火遮眼一踭批埋去，犯規之餘仲俾現場5,000名球迷怒噓，輸波輸風度仲輸埋民心。
黐錯波衫冧巴9變P
其實T-Mac今場未開波已經行路打倒褪，大頭蝦將波衫漏低咗喺酒店，要球隊職員拎件冇號碼嘅波衫，臨時用膠紙黐個9字上去頂住檔。點知好衰唔衰，調轉咗嚟黐，9字變P字，好似幫緊李安大導套新戲宣傳咁，麥基迪變咗33歲嘅「中年Pi」。不過，呢單爆事件阻唔到佢嘅神勇表現，第一節就已經有16分進賬，青島仲以33:29領先。
青島因為其他球員認真唔掂，完全頂唔住有馬貝利得14分、10次助攻為首嘅主隊。不過，呢場吸引咗成5,000名球迷嘅「麥基迪對馬貝利」超級矚目大戰，最大亮點反而係第4節嘅一次衝突。
難忍奀星搖手指挑釁
話說第4節北京嘅吉喆，喺禁區頂射入3分之後，向T-Mac做出名宿莫湯保招牌搖手指姿勢，後者見到呢個26歲強國奀星，竟然夠薑挑釁佢，又點會忍得到？所以之後T-Mac去到前場，等到吉喆一行近佢，就一踭鬆埋去。慢鏡見到小吉中招後，即時狀甚痛苦，可見T-Mac完全冇留力。雖然先撩者賤，係小吉冇大冇細在先，但球證都係罰T-Mac惡意犯規同個犯，白白送咗4個罰球畀北京。
青島教練覺得應該大事化小，喺最後一節中段換出一掂波就被噓嘅T-Mac，球隊就以14分再輸，慘遭7連敗。賽後食咗一踭嘅小吉死唔認錯：「我搖了（手指）嗎？我忘了，大概是太興奮了。不過下次會注意點，不然又被打。」馬貝利就話T-Mac唔啱，不過就好理解成日輸波好難受，但就畀唔到咩建議佢。T-Mac幾乎場場都交足貨（見附表），但係贏極都贏唔到，下場作客天津，唔知青島可唔可以開到齋呢？