「佢都係講吓，大家都係得兩隻手，佢唔會多兩隻手嚟打我啫！」兩個今晚喺會展「王者之戰」拳擊賽中，爭取WBC亞洲洲際金腰帶嘅對手曹星如（Rex、圖）同沙利夫，噚日喺過磅後先來舌戰，綽號「麻煩友」嘅吉爾吉斯「1哥」沙利夫，先大口氣咁話：「我去咗俄羅斯集訓3個月，聽日會令Rex輸得口服心服。」25歲嘅「香港精神」Rex，喺職業賽7戰7勝，佢即時反擊咁話要喺頭4 round擊敗對手：「有大班觀眾現場支持我，我會好似插咗電咁，有用唔完嘅精力。」比賽打12回合。
Rex除咗觀眾外，仲有樂隊廿四味現場邊唱《Bring it on》邊帶Rex出場，認真威威！今晚賽事從6時半開幕禮展開，共7場比賽。 （now676台今日8:00pm起直播）