能夠扑中單過千億元大刁，分到巨額顧問費，畢竟係少數。金融界今年由年頭喊到年尾，冇被裁走算好彩，花紅大減屬意料中事，紐約州審計長近日作出預測，今年華爾街員工平均只有10.1萬美金（約78萬港元）花紅，比06年少一半，係08年金融海嘯以來最少嘅一年。
平均得10萬美金
過去兩年，華爾街員工平均花紅分別係13.9萬同12.1萬美金，今年得番10萬，真正一年少過一年，今年市況冇乜起色，花紅再減都唔係新聞。花旗上周先話裁員1.1萬人，聽到呢類裁員消息，有時寧願公司減花紅，好過裁員。
話雖如此，員工少收花紅始終唔高興。聽講，有高盛員工舊年收到支票時，竟然高呼「大屠殺」，如果呢位仁兄仲喺度做，今年可能要大叫「冇天理」！