中海油（883）攞過千億出來收購加拿大油公司Nexen，上周五終於獲加拿大政府開綠燈，家只等美國監管當局首肯。雖然單刁未埋尾，但有人已經幫中海油、Nexen兩邊合共四間投資銀行計數，估計佢哋分分鐘可以攞到7.8億顧問費，相當肥仔！
保住飯碗 再分花紅
據Nexen早前遞交嘅文件顯示，成單刁的費用同開支約為8170萬加元（約6.3億港元），當中包括畀高盛同加拿大皇家銀行嘅顧問費。中海油嘅財務顧問係花旗同蒙特利爾銀行，但就冇披露要畀幾多顧問費。
彭博就搵人估計，代表買賣兩邊嘅顧問費介乎6.2億至7.8億元。
如果呢四間行真係攞到咁大筆顧問費，員工明年應該可以放心啲，暫時唔驚公司為減成本而裁員，隨時仲有花紅分，不過仲要睇美國批唔批。