今年3月6日「金手指」六周年，孫柏文叫大家一注獨贏珠江鋼管（1938）。原因係由花旗國開始嘅頁岩氣（shale gas）革命，將會伸展至全世界，而中國第一氣管生產商就會係呢場革命中最受惠。
由嗰日開始計，珠江鋼管升超過兩成，跑贏大市。當然，一定有fan屎話：「不過，跟你買珠管嘅話，要先跌44%，先至升一倍幾。要跌咁多先，即係你個300萬《爽》倉揼晒落去嘅話，未贏前，已經出局。」係，今年就係咁難炒。
依舊睇升至7蚊
當時，我話過珠管我睇7蚊，仲要話係喺12個月之內。家我都係話7蚊，都係下年3月6日就到。點解？除咗佢賣嘅產品啱頁岩氣革命外，仲要係佢哋瘋狂增加生產量。
其實，大陸78年開放後嘅工業故事，就係生意好，之後各企業瘋狂增產，之後over capacity，就鬥死個毛利率，如果有上市就股價大跌害死股民。
不過，如果你豪賭大幅增加生產量，又遇到行業需求結構性大增，咁你就基本上印銀紙。佢哋喺連雲港、珠海等地增加倍計嘅生產量，毛利率唔變，利益會倍增。
之前民企風暴，好似珠管呢啲近年盤數越靚嘅公司，就越被人質疑。不過見早排Muddy Waters都轉戰打新加坡淡馬錫嘅公司，都知沽強國民企已冇肉食。
仲有，你話我煩都好，我都要講。以前我做石油股分析員時，有次中海油（883）中期業績分析員發佈會上，嗰陣仲係傅成玉揸旗，啲填鴨式大行分析員係咁問關於天然氣項目嘅嘢，煙癮起問到我火都滾，因為就算賣天然氣嘅營業額點高都好，都係冇得賺，因為發改委限價。如果上游下游都做晒嘅中海油都冇得賺，邊個賺？咪賣嘢畀中海油嘅供應商囉。下個禮拜二再講啲非股票嘅投資項目。
孫柏文
獨立股評人
本欄逢周二刊出
http://facebook.com/shuen