香港人基本大部份都是順民，有得馬照跑、波照賭，已經滿足好多人嘅願望；但CY禮拜日到馬場為國際賽頒獎，馬迷賭得興起都照噓佢，佢嘅特首5年任期，家先至做咗未夠半年，睇嚟佢老哥唔腳痛就真係有排捱。
領隊/教練冇一定期限，不過西班牙傳媒就好心水清，講皇馬教練摩連奴，未嘗執教喺一支球隊超過4年，今年佢已經帶皇馬第3年，如果保持摩佬傳統，最多下季尾就會離開；甚至連「親皇馬」嘅《馬卡報》，都已經整咗個網上投票，畀球迷選擇下任皇馬教練，結果現任德國國家隊教練路維最受歡迎。
誠如曼聯領隊費格遜所講，摩連奴去到邊個聯賽都會成功；以摩佬今時今日嘅地位，皇馬唔要佢，真係完全唔怕冇出路；特別喺英超，曼市雙雄都吼住佢。小弟一向都睇低曼城領隊文仙尼，當年帶國米攞聯賽冠軍，只因AC又老又殘，祖記又畀假波案拖累，其實任何人帶呢支國米都應該贏，到08年摩連奴接手國米，伊巴謙莫域在09年轉投巴塞，實力理應削弱，摩佬都可以帶呢支國米拎3冠王，所以我都幾期待摩佬接任曼城，用呢班兵人腳，真係又做3冠王都唔奇，到時又狠狠咁摑連續兩屆歐聯分組賽出局嘅文仙尼一巴。
不過以目前形勢，曼城搵哥迪奧拿機會甚濃，費Sir都70歲，佢似乎心儀摩連奴接任曼聯領隊；一個小弟最欣賞嘅教練，如何帶一支小弟最唔鍾意嘅球隊，效果又係點？
文：牽牛