白鴿黨人稱「一嚿雲」嘅黃碧雲投票立場又有異樣喇！繼早前佢本嚟贊成調查行政會議成員林奮強偷步賣樓，但因「機件故障」變咗投棄權票後，上周五政府只係提出2,000幾萬嚟請人搞長者生活津貼嘅撥款，以圖變相剪布，碧雲姨竟然又冇同白鴿黨一齊投反對票呀！莫非佢又變咗一嚿雲夢遊立法會？非也，今次佢用「出席但不投票」呢個騎呢立場，去代佢嘅選民表態囉。
冇時間開黨團決定
八方睇番當日投票結果，赫然發現黃碧雲竟然係「出席但唔投票」，冇同民主黨其餘三子涂謹申、單仲偕、胡志偉一齊投反對票。碧雲姨嘅出格行為惹起網民關注，擔心碧雲姨又因為機件故障而投錯票，或擔心佢今次真係投錯咗。碧雲同八方講，查實呢個「出席不投票」係佢真正意思，唔關其他人事。
碧雲姨解釋，民主黨反對政府咁樣剪布，所以一定反對2,000幾萬嘅開位撥款。但當時民主黨都唔得閒召開黨團嚟決定點樣投票反對，所以惟有各有各投。而佢認為「出席但不投票」嘅立場，同投反對票嘅效果一樣喎。
不過政圈流傳，唔少泛民都贊成呢次剪布，只係唔想孭起「贊成剪布」呢個罪名啫，唔係點解當日有成20位泛民「咁啱」唔在場投票先？
mailto:[email protected]