黃浩經營嘅餐廳爆出有藝人喺包房吸毒後，傳出吸毒實況被拍下短片，徐濠縈仲捲入呢件事，聽聞佢老公陳奕迅即刻出手搵演藝人協會主席曾志偉出頭，結果志偉幾日前喺鄭嘉雯婚宴撞到黃浩，飲大兩杯同黃浩嘈起嚟，最後黃浩報警聲稱俾曾志偉掌摑，志偉跟住再發表食屎狗論，其他藝人爭住撐志偉仗義。杜如風噚日為旺角一間潮人時裝店剪綵，話件事已真相大白。
成日前言不對後語嘅黃浩俾人打完兼鬧爆後，呢排出街都多咗保鑣跟住，仲突然變得低調，竟然封口乜都唔肯回應。
「包容任何動物」
杜如風噚日現身活動時，被問到對志偉食屎狗論有乜睇法？杜如風話：「我係保護被遺棄動物協會代言人之一，所以我會包容任何動物嘅，其實件事都過去啦！我冇再嬲，已經真相大白，不過某人一時話有片、一時話冇片，佢係咪應該出嚟交代吓！」
噚日有報道話掌摑事件當晚，梁漢文係同志偉一齊向黃浩進逼，仲爆埋粗。馮仁昭噚日問梁漢文有冇咁嘅事？佢話：「冇爆粗，冇咁嘅事發生喎！真無辜！」
撰文：馮仁昭
一人一票投蘋果【萬千星虧】，對撼 CCTVB 公投↓↓↓
http://tv-voting.appledaily.com/