新版《古惑仔：江湖新秩序》未上畫已爭議不斷，羅仲謙、梁烈唯幾位大佬脂粉味重，被嘲似「鴨鴨」多過似行蠱惑。不過電影預告片日前曝光，意想不到的有梁敏儀幾乎全裸色誘羅仲謙，而在高登人氣爆燈的足球評述員黃興桂更出演牧師一角，兜腳踢沈震軒要害，有今生冇來世。
由王晶監製，羅仲謙、沈震軒及梁烈唯主演的《古惑仔：江湖新秩序》，獲安排在明年1月10日上映。預告片日前曝光，居然有不少亮點。已故林尚義當年在《古惑仔》飾演牧師相當搶戲，新版則由同樣是講波佬的黃興桂演出，有幕拉弓勁射沈震軒下體，見到他咬牙切齒「一嘢轟落去」，大快人心。
原來「桂神」並非首次演戲，對上一次是74年拍黃霑的《天堂》，而他為演活牧師角色，熟讀劇本之餘，又找米雪和曾江教戲。至於可擔心跟林尚義比較，桂神昨在電話中說：「呢個唔使驚啦，盡力而為，邊個做得好唔好見仁見智啦！我唔需要學阿叔囉，都唔知佢做成點，我都冇睇過佢哋嗰集。」他又大爆在戲中會加插啜核金句。至於梁敏儀飾演Anna有超性感演繹，除肉搏沈震軒外，又疑似全裸色誘羅仲謙說：「如果你唔介意，試吓我嘅手勢吖！」看得網民嘩嘩聲。
不過網民普遍還是彈多過讚，主要針對羅仲謙飾演的陳浩南零霸氣，講對白氣若游絲。至於沈震軒演的坤好壞參半，有人以為他在扮《蝙蝠俠》的Joker。
唯唯與網友駁火
此外，梁烈唯（唯唯）昨在微博跟網友開火，事緣有網友留言批評此戲說：「香港電影市冇得救，點睇都係成班茄哩啡。」唯唯反駁：「茄哩啡即是臨時演員，臨時演員都係演員！從你的評論就知道你非常關心香港電影圈，所以不論如何，你都要來香港，購票入戲院支持我們啊！」
採訪：林妃
一人一票投蘋果【萬千星虧】，對撼 CCTVB 公投↓↓↓
http://tv-voting.appledaily.com/