咖喱牛腩，有辣有唔辣。牽牛同咖喱將總結每周球賽，見到抵讚嘅事，牽牛定必重重有賞，用幾百字大讚吓佢；但見到抵鬧嘅人，咖喱就會毫不留情，省佢一餐。
禮拜日場場英超都夠晒峯迴路轉，曼市打吡當然精采，尹佩斯盡顯功架；利物浦亦證明到冇蘇亞雷斯都識入波，可喜可賀。不過，今日就想講吓熱刺又臨尾香輸波嘅問題，應該係話波亞斯嘅問題先啱。
睇番熱刺今季聯賽嘅失波分佈圖，趨勢係越近完場就越多失波。佢哋上半場只係失5球，但下半場就砰砰聲失咗20球，其中喺最後15分鐘竟然失咗10球。點解會咁？我可以話防線唔集中、球員體力唔夠等理由，但係我覺得呢啲原因太冇誠意，所以搵咗啲數據研究吓。
根據上季嘅紀錄，熱刺喺哈利列納帶領下好少臨尾失波，喺聯賽41個失球中，僅得6球喺比賽最後15分鐘所失！不過，就咁對比呢兩季熱刺嘅失球時間分佈，只能證明今夏嘅某啲轉變導致到呢個差別嘅出現，唔能夠好有說服力咁指出同任何人有關。見係咁，我再去搵多個數據，就係波亞斯上季執教車路士嘅失球時間分佈。
當我逐場逐場咁數番上季車路士嘅比賽嗰陣，我好震驚，假設冇錯，波亞斯真係一個臨尾香嘅領隊！喺佢畀車路士炒魷前，波亞斯教咗27場聯賽失咗32球，其中多達12球喺比賽嘅80分鐘後所失，比率高達38%。近4成嘅失波喺比賽最後1/9時段發生，真係個好恐怖嘅數據！
事先聲明，咖喱專欄非精密科學；我在此宣佈波亞斯今季好「成功」咁將臨尾香現象由車路士帶到熱刺，熱刺球迷節哀順變吧。
文：咖喱