又到聖誕，大家係唔係開始忙緊買聖誕禮物呢？吳爽呢排都忙爆，淨係度吓買乜好嘢畀城中幾位人氣賢達都好唔得閒。嗰班達官貴人啲錢多到使唔晒，物資豐富，除咗心靈之外，基本上乜嘢都有，所以真係費煞思量。好在有班朋友建議咗一張禮物清單，但係就冇講明送畀邊個，不如大家幫手配對吓。
吳爽
（讀者請發揮想像力自行配對）
假牙
講大話，甩大牙。朋友話好驚城中某位呃個官返嚟做嘅低民望長官太鍾意呃人，又成日講嘢唔算數，做人冇口齒，牙齒結構好快會鬆脫，剝落到好似西九豪宅凱旋門啲玻璃咁，所以建議送副假牙過佢，等佢晚年唔使咁折墮。
咖啡
聽講話有位特區政府智囊本來好鍾意出嚟說三道四，但係自從被傳媒踢爆偷步買嘢之後，全城喊打喊殺，搞到佢呢排搏命搵窿捐，好耐冇出嚟攞彩。聽講佢仲俾人舉報，涉嫌公職人員行為失當。所以呢杯咖啡查實唔使我哋送畀佢，老廉自然會請佢飲。
LEGO
界限街以北有位鄉紳保鄉衞族好英勇，但凡政府話要依法辦事取締村屋、丁屋僭建物，佢就會挺身而出捍衞原居民權益。朋友好擔心呢位老哥會玩出火，所以打算送盒LEGO畀佢，既可滿足吓佢嘅僭建慾，亦可以保障屋宇署人員嘅性命安全。
掌心雷
打過美好嘅仗，種過唔應當種嘅票。朋友話新一屆立法會硬係好似爭咁個人，但係佢又嗡唔出名，淨係記得呢條友鍾意玩掌心雷，不過就玩得唔係好純熟，搞到自己雙失咁話。其實呢家咁毒嘅武器真係唔應該隨便攞嚟玩，所以都係唔送好過嘞。