免費報紙競爭都幾激烈，其中一份都好受歡迎吓嘅免費報《am730》，老闆施永青向來都對員工唔差。今年市道唔錯，通脹又勁，到咗年尾，打工仔自然好想知道年尾花紅同出年加人工到底有冇着落啦。八方就收到風，《am730》員工可以開開心心過肥年嘞！
八方聽聞，《am730》管理層最近決定，員工明年會加薪逾5％。分花紅方面，更加豪到令唔少打工仔都流晒口水。
管理層獲22個月糧
據聞前線記者、一般員工，今年一共會出約15個月糧。而中層員工，會出18個月糧㖭呀。嘩！出成一年半糧咁勁？仲未算呀，老友報料話，《am730》嘅管理層，今年可出到22個月糧，即係接近兩年人工呀！不過唔知會唔會令人覺得肥上瘦下呢？如果前線員工都分多啲花紅，效果會更好。
見到行家可以分享到經濟成果，八方都為佢哋高興，唔知《蘋果》同《爽報》情況又如何呢？等八方搵日問吓老總沙膽虹先！