港股高位徘徊，不斷有股份創52周新高，配股活動隨即頻繁，唔少消息已係街外傳咗N個月。如某隻零售股王，每年到時到候，大股東就會批股當出糧，但今年仍未見影；至於今年賣樓成績超靚的潤地（1109），亦因為要向阿媽買project，而成日被人估要出貨集資。不過有芬佬朋友就引述呢啲公司嘅高層話，未有打算賣股喎！只因覺得股價仲有得升。咁睇好？唔係吓？
以潤地為例，公司股價在16、17蚊時已傳出要批股，當時公司財爺見投資者時，已經開口埋口被人問住晒。據潤地嘅講法，係因為計過條數，覺得分批買入阿媽的資產更着數，因為家全世界都睇好佢哋仲有增長，股價仲有得上，如果先買規模較少的廣西南寧項目，明年先再收購深圳大衝project，咁樣公司自己內部資金就足夠支持發展。然後可以靜待一個更靚的價，先出手抽水。
觀乎潤地的走勢，芬佬們似乎好buy呢個story，認為批股overhang已經消除，所以唔再等，一口氣掃返上廿蚊樓上。至於有一間長期給予潤地「中性」的券商，今年明顯已估錯邊，呢排不停唱潤地要批股，唔知是否有其他考慮？
海迪