反國民教育學生領袖、學民思潮黃之鋒近日去咗台灣同八九民運領袖王丹見面交流，同王丹一齊食花生，談學運，羨煞旁人。前日就有傳媒問咗教評會副主席何漢權點睇，何生話呢類交流係好事，但希望王丹喺讚揚黃之鋒外，可以幫佢全面分析歷史，講解國民教育同國民教育科嘅分別，勸吓之鋒繼續追求學問。
之鋒噚日將何漢權嗰單報道，拎咗畀王丹睇，知唔知王丹有乜反應？佢第一時間就問：「誰是何漢權？」今次王丹「不知道何漢權是誰」，唔知會唔會令到何漢權好冇面呢？
今次會面，係王丹有份發起嘅「華人民主書院」，請咗黃之鋒、林朗彥同黃莉莉等學民仔去台灣，行程仲參觀咗當年囚禁政治犯嘅綠島。