曾同李思捷傳緋聞嘅32C模Naomi（馮鎵瀠）噚日凌晨突然去咗尖沙嘴警署報案，佢聲稱遭人非禮。據知佢前日中午去咗尖沙嘴為林超賢執導新片《逆警》中一場強姦戲角色試鏡，呢個角色黃榕同仙樂都亦試過戲。
27歲嘅Naomi噚日凌晨時分去咗報警，佢逗留咗40分鐘就有警方人員陪同佢重返附近柯士甸道案發現場，之後警員同Naomi再折返警署，跟住佢由側門坐的士走咗。
涉案副導停職
馮仁昭噚日打畀Naomi，佢話：「噚日去試鏡，當時副導演同我喺後巷試一場強姦戲，佢試到好真，雙手伸入我個bra，仲揸住我個胸。」Naomi覺得唔對路，當時猛叫停：「男副導解釋話想試我嘅底線可唔可以露點，佢有講唔好意思，但我發現個胸紅晒，落樓打畀經理人，又問番黃榕同仙樂都，佢哋話試戲對手係女仔，我越諗越唔開心，唔想同行女仔受害，要指證呢個害群之馬。」
警方發言人噚日話凌晨有一名27歲馮姓女子到尖沙嘴警署報案指遭人非禮，警方已拘補一名24歲涉案男子，該男子已保釋，下月初再返警署報到。林超賢噚日係電話回覆話：「我已經知道呢件事，已要求涉案嘅副導演暫時停職 ，由於警方調查緊，我唔方便講咁多，之前有幾個女仔試鏡都冇發生過呢啲事，唔知點解今次會發生，為免尷尬，暫時唔考慮同Naomi合作。」
撰文：馮仁昭
