球證吹錯咗，絕大部份都扮冇嘢，當乜事都冇發生過；不過，德國球證史達克就勇於承擔責任。佢話喺上周六場德甲，錯誤判罰多蒙特12碼兼趕佢哋嘅球員舒姆沙出場，所以要就事件道歉。
喺對上兩季贏咗德甲嘅多蒙特，前晚迎戰禾夫斯堡反輸2:3，轉捩點係36分鐘嘅12碼，史達克指護空門嘅舒姆沙手球，於是畀紅牌佢兼罰佢哋12碼；迪亞高一射中鵠，之後拿杜仲喺41分鐘幫禾堡反超前2:1。雖然多蒙特喺61分鐘靠巴拉斯塞高斯基入12碼追成2:2，但禾堡前鋒巴斯杜斯喺73分鐘入致勝球，助球隊最終贏3:2兼爆個12倍冷W。
查實睇番重播，個波係中咗舒姆沙個膝頭，所以史達克賽後亦就自己兩個錯誤決定致歉。呢位43歲嘅德國國際球證咁話：「我之後睇番事發經過，好唔好彩，我真係判錯咗嗰球12碼同埋嗰張紅牌。」雖則史達克肯認錯，但就改變唔到搞死多蒙特嘅事實。
已落後拜仁14分
多蒙特反輸2:3後，家落後榜首嘅拜仁慕尼黑14分，除非有神仙打救，否則冇可能實現德甲3連霸嘅美夢。多蒙特教練高路普非常氣憤，賽後仲唔肯同禾堡教練高士拿握手。
高路普咁話：「呢個係殘忍嘅判決。當我哋領先1:0嘅時候，禾夫斯堡根本一啲機會都冇。」