噚晚係皇仁書院150周年晚宴,擺咗190圍,全場有2,300人,霍震霆代表老竇霍英東到場,但就唔肯講捐咗幾多錢。食衞局局長高永文、中大校長沈祖堯等150個名醫校友大合唱 《You Raise Me Up》。
著名校友仲包括金管局總裁陳德霖、科大校長陳繁昌、嶺大前校長陳坤耀、中大副校長霍泰輝、肝臟移植名醫盧寵茂等;立法會議員校友就包括湯家驊、胡志偉、梁繼昌等。
而何鴻燊喺四太嘅協助下,喺屋企拍咗約半分鐘嘅祝賀說話短片,但係咬字唔係好清楚,健康好似比之前差咗喎。
整個晚宴成四小時,除咗拍賣、樂團表演,六個皇仁議員仲進行咗一場大辯論,火花十足。