近年冇人留意嘅俄鋁（486），今年5月至今醞釀大圓底嘅走勢，個底打得咁靚絕對唔係冇原因，晉佳綜合得出三大利好因素。
第一，亦係最直接嘅因素，係鋁價似有見底迹象。倫敦期鋁由6月初至11月喺每噸1800至1900美元打底之後，近排升番去2094美元，升勢由11月展開，亦扭轉咗中長線浪低於浪嘅走勢，改為一浪高於一浪，似乎有展開中長線升浪嘅趨勢。俄鋁7至9月鋁成本每噸1936美元，較當時倫敦期鋁價格仲要高些少，結果俄鋁第三季虧損1.18億美元，只要鋁保持現價，俄鋁肯定已開始有錢賺，如果重拾中長線升勢，盈利更有機爆升。
其次，俄鋁同俄國富商波塔寧（Vladimir Potanin）旗下Interros，就全球最大鎳及鈀生產商Norilsk Nickel嘅股權問題出現爭拗，近日發展對俄鋁較有利。事緣俄鋁同Interros各佔Norilsk約25%股權，而整個董事局有13個席位，前排俄鋁只得3席，Interros就佔4席，俄鋁自然唔夠大聲。
三大利好因素
不過，同俄鋁同聲同氣嘅車路士班主阿巴莫域治，旗下公司買入Norilsk嘅7.3%股權，仲可以派1個代表入董事局，雙方陣營將各佔4席，但俄鋁陣營就持有多啲股權，由弱勢變強勢。
究竟事件對俄鋁有乜着數？原來Norilsk持有大量現金，每年派發約20億美金股息，而俄鋁持有25%股權，每年可收5億美金股息，可以大大改善財政狀況。睇目前嘅局面，俄鋁同車仔班主聯手嘅話，就由下風變成佔上風，對俄鋁股價有利。
第三個有利因素，就係俄羅斯最近成功加入世貿。俄羅斯入世後，會將關稅比率降低，同埋引入更多外資，對於刺激經貿有好處，俄鋁點都會受惠。
俄鋁嘅大圓底頸線處於4.90元，強勢突破嘅話，股價應該可以進入大型升浪，中線要翻半番重上7元嘅3月高位，難度唔大，短炒嘅話，先睇5.50元嘅密集阻力區。
晉佳
本欄逢周一、三及五刊出