【本報訊】經歷了今年10月的慘痛黃金周之後，本港零售商迎來最後一個淘金節日──聖誕檔期。零售商均表示，踏入11月，消費氣氛的確有好轉，相信勢頭可以延續，令聖誕檔期可重拾增長。不過，有商戶認為，今年市道較去年差得遠，表現仍是「完全冇得比」，故今年聖誕要諗計谷生意，多做宣傳才可望在高基數下有較佳的表現。
記者：吳綺慧 鄭柏齡 程俊華
整體零售市況反覆，天氣偏暖又多雨，令冬季的銷售變得慢熱，加上商戶整體存貨水平仍然偏高，故不少人都提早進行減價，加大折扣促銷。如全港最大的服飾零售商I.T（999），據悉，於11月中史無前例地加插了幾日清倉減價，平均四折，最低達一折，先清減存貨，輕裝上路。
專賣潮服的包浩斯（483）財務總監李建昌表示，由於其他競爭對手提早減價，他們亦要因應市場作出反應，但減幅不算太大。反而公司在10月開始「轉移陣線」，集中火力推出旗下手袋，期望借手袋銷售來彌補較疲弱的服裝生意。「服裝競爭的確好大，反而手袋就一直表現唔錯，我哋覺得有potential（潛力），所以做好多電視廣告，專門賣手袋，成功帶動同店銷售有20%增長。」
鐵達時廣告助生意跳升
李建昌表示，公司接着聖誕亦會推出新一波手袋宣傳，希望逆市中可做到較佳成績，「11月的生意基本上都維持到增長，按趨勢嚟睇，我哋對聖誕生意都樂觀，預期12月可以keep到之前嘅表現。整體來講，零售氣氛已經回穩咗，衫都賣得比上半年度好。」
經營「時間廊」及「眼鏡88」的寶光（084），12月亦為旗下品牌鐵達時推出長達四分鐘的廣告，引來網民熱烈迴響，有望帶動聖誕檔期生意。寶光主席兼行政總裁黃創增表示：「廣告出街後兩日，生意即刻有跳升，不過12月初天氣唔好，成日落雨，冇乜人行街，都有啲影響。我希望到月中表現會好啲。」
賣中價錶的寶光，10月及11月同店銷售都有雙位數增長。黃創增形容，今年零售環境「唔係幾好」，雖然氣氛已較數月前改善，但與去年比較，仲係「差好遠」，「我都唔敢講聖誕會唔會好，始終市況唔就，舊年基數又高。我哋係審慎樂觀，應該唔會差過市場嘅增幅。」
佐丹奴對聖誕銷情樂觀
另一便服零售商佐丹奴（709）以不斷「crossover」為定位，公司指雖然近月天氣偏暖，都有影響生意，但由於不停有新推廣活動刺激，11月至今銷售按年有雙位數增長，對聖誕檔期表現樂觀。佐丹奴又稱，今年暫時毋須加大折扣，一般是七折，和去年差不多。六福（590）主席兼行政總裁黃偉常亦預計，自黃金周後，同店銷售已回復增長，認為今年最壞的時候已過，期望聖誕節同店銷售有20%增長。
消費者意見
花費減半
內地旅客孟小姐： 「內地經濟不太好，去年聖誕花了20萬，今年只花10萬，主要買手錶、手袋及化妝品等，到香港的次數亦減少了。」
不會揮霍
本地市民簡小姐：「唔會使好多錢，可能只係花一千蚊左右買飾物、護膚品等，同舊年差唔多，覺得零售市道仍然好旺。」
業界對選股意見
I.T難炒起
訊匯證券行政總裁沈振盈：「香港零售市道仍疲弱，理論上可炒作吓，不過要快手，聖誕前要沽咗佢，同埋要識揀，好似米蘭站（1150）同I.T（999）就未必炒得起。」
睇好莎莎
康宏証券及資產管理董事黃敏碩： 「聖誕都有可能會炒吓一啲零售股，不過要揀啲第三季表現好嘅公司，例如莎莎（178）之類，比較有市場定位，產品屬中價位。」