狼振英政府上場後搞到天怒人怨，唔少市民除咗想唔交稅，仲嬲到想講粗口。上星期六喺立法會聽到團體就新界東北發展計劃表達意見，其中一位小市民，就巧妙地玩廣東話食字，用諧音粗口大鬧狼振英。
狼英僭建花棚偽君子
呢位自稱係「調理農務蘭花系幹事」嘅莊明堅先生，劈頭就話蘭花係花中君子，但係特首狼振英就係偽君子，可以僭建花棚去種蘭花，但係唔畀小市民喺新界東北「調理農務」喎。
唔少人聽到呢度都覺得有啲唔對路，但係佢接住講落去，又好似有紋有路喎。佢繼續話，大陸、台灣出口嘅蘭花有百幾二百種，賺到唔少外滙，但政府要搞新界東北，「點解我哋調理農務係咁難呀？」佢話自己種蘭花近40年，日出而作、日入而息、 清茶淡飯、與世無爭，「點解你個福佳梁繼（振）英仲要割地賣港毀我家園！我哋反對東北計劃，正所謂斷人衣食，猶如殺人父母 ！」講到最後，佢仲喺立法會上呼籲大家明年1月1號，參加元旦大遊行，「打倒梁振英」。