為免大埔龍尾泥灘變人工泳灘，15個關注龍尾嘅民間同環保團體喺10月組成「守護龍尾大聯盟」挑戰政府，仲打算進行司法覆核推翻政府決定。喺內地敢言嘅深圳《南方都市報》，竟然同大聯盟企喺同一陣線，頒發2012年〈深港生活大獎〉年度城市保育獎畀大聯盟，肯定大聯盟為深港兩地維護生態嘅貢獻。
大聯盟話對有內地傳媒肯定保育龍尾嘅工作，感到高興，將繼續守護龍尾。大聯盟將於今日去信政府，要求下周五前，回應有關取消環境許可證嘅決定。但何解今次《南都》咁大膽同政府唱反調？原來評委有唔少香港人，包括陶傑、歐陽應霽同陳幼堅等。