普拉達（Prada，1913）交出亮麗業績，加上券商大合唱，股價抽升一成創新高，做手袋代工兼有自家品牌嘅時代集團（1023）亦應聲破頂；至於主力手袋代工嘅理文手袋（1488），現價較今年高位仍低17%，揀落後股別無他選。
截至6月底，理文手袋中期營業額上升30.8%至4.84億銀，期內盈利增長45.1%至5357萬銀；受累內地人工勁漲，毛利率輕微回落2.9個百分點至23.9%，純利率卻因為少咗去年度嘅上市費用而回升至11%。理文手袋最吸引地方在於派息豪爽，以中期息5仙計，年度化息率高達10厘，防守力一流。
理文手袋上周五收報0.98元，升1%，今年累升58%，大幅跑輸普拉達及時代集團嘅1倍及90%升幅，絕對有力收窄差距。睇圖表，理文手袋呈圓底走勢，並一直守穩10日線，動力十足，短炒目標先睇1.20元，潛在升幅22%，屆時年度化市盈率都只係9倍。
唐牛