市傳會來港上市嘅廣發銀行，由舊年傳到今年年尾都未有聲氣，近日內地傳媒就有單關於廣發行嘅風水八卦料。有位風水師章宇龍喺微博爆料，指廣發行早排請佢去總部大樓睇風水，仲要為新行長辦公室策劃風水，講授周易智慧課程。連廣發行都搵佢，呢位師傅應該有啲料到。
點知廣發行隨即透過官方微博回應，指章宇龍只係去廣發行支行，為該支行將為客戶開嘅《易經》理財講座進行溝通，暫時仲未決定搵邊位專家做講師。章師傅轉頭亦刪咗微博內容，仲發聲明話唔係去廣發總行睇風水。
查實中國人老闆搵人睇風水擺陣真係閒過立秋，好多風水師傅就選擇低調，尤其係幫有錢佬或者大機構睇風水嘅師傅，以免俾客人誤會博出名。話雖如此，廣發行呢次真係搵師傅教客戶用《易經》理財都未定，事關A股陰晴不定，基本因素都冇乜好講，用風水理論來教人投資不失為一條好橋，好過亂講！