豐德麗（571）係麗新系內最落後，炒完麗豐（1125），再炒豐德麗。由麗展（488）全系9月中起動計，麗展已經翻咗一番，內房麗豐亦升咗五成，兼齊齊創一年新高。豐德麗又點？52周高位1.67元，家陣大落後。
麗豐前排供股，豐德麗喺麗豐權益由原先40.5%，上到47.4%，權益變相增加，麗豐內房業繼續發熱發亮，豐德麗家底繼續肥仔。Before that，豐德麗NAV 6.44元，家陣位嘅折讓挨近80%，好吸引。再講，集團手頭現金高達41.6億銀，銀行貸款連埋票據債務總共35.6億銀，有淨現金6億銀，又係現金牛。上個禮拜主打麗豐，炒同氣連枝，買豐德麗，當翻半番計數，上到1.95元，NAV折讓仍然高達70%。
香港華人資產靚
香港華人（655）同前排寫過嘅遠東發展（035）一樣，喺沙士打後，已經發展香港以外地產業務。家陣物業發展遍及中港澳及星洲，一樣有地區多元性概念，一樣受惠地區資產升值，但華人仍然超級落後，所以，超級抵博。博華人升19%到見1.50元，折讓仍然挨近70%，以亞洲區地產股計數，仲係好吸引。
錢雋