葉玉卿由亞姐出道至今，一直保持驕人身材，卿卿透露健美之道：「我做咗六年普拉提（Pilates）呢種健美體操運動，七年前同兩個仔喺拉斯維加斯玩機動遊戲撞親心口，痛到瞓覺都唞唔到氣，痛咗九個月，要食藥止痛，咁啱朋友做普拉提，跟埋一齊做，嗰晚連藥都唔使食。」自此卿卿繼續做，又與朋友踩室內爬山單車，高峯期每星期做六日，每日做兩種運動共三小時，現時每日都會抽空做一小時普拉提。
自嘲開始縮水
至於飲食方面，卿卿笑言：「君如都話見我食嘢唔使咬咁，以前拍戲時食好少，但休息時會猛咁食，我家唔係瘦，係縮水，哈哈……」卿卿每朝起床先食兩隻蕉，送完子女返學後回家再食大碗粥，午餐最愛食沙律，夜晚就跟家人食，她說：「工人煮乜都食，零食都鍾意，最鍾意食百力滋。」