有朋友分別因為公事和私事要啟程去日本了，公事在身的當然萬般不願意，明知山有虎偏向虎山行？一早知架船入面有老虎的話，實在冇乜理由落船，理由只有一個，就係生存；而香港人生存的最大意義就係打工。與此同時，那位愛日本如命根的朋友輕鬆上機：「擔心得咁多咩，家陣香港搭巴士出事機會夠冠絕全球啦，check in唔該！」
送死定係返屋企，睇你咩角度啦。冇獎問答遊戲，香港有咩巴士係外國人坐嘅？夠鐘，答案係開篷巴士，就係嗰款響碼頭上車，響市區繞一圈嘅觀光巴士；試過幾次響彌敦道見到呢款巴士經過時，馬路口的我目光保持呆滯，車上面嘅佢哋卻響你唔想睬佢哋時熱烈揮手，慘被反客為主嘅你心諗：「大佬呀，高樓大廈啫、維港夜景啫、唔駛咁high吓嘛，小心凍親呀。」或者響災區嘅災民，笑容仲多過香港人。
開唔開心、高唔高興或者真係同環境未必直接掛勾，贏2:1嘅賽事可以俾你媽到阿爸都唔認得；之但係輸0:1呢，又可以得到大家一致的thumbs up！香港人睇香港隊，唔係咁簡單同你講攞咗幾多分，而係講心。
笑匠許冠文講過，每一個笑話背後都有一個悲劇。你發笑嘅時候，另一邊其實總有人係流緊眼淚，理論聽落有啲殘酷，但係若果調轉嚟諗，即是話悲劇背後，一樣會有佢嘅另一面；關島僅敗於香港1:2，響佢哋國家嘅《新聞透視》裏面絕對係值得高興，甚至會刺激佢哋發奮努力，務求有日終於搞掂香港；其中一個諗法，係提供VIP待遇吸引陳七入籍。
上周難得同一班韋斯咸球迷一齊睇波（所謂一班其實得10個左右），結果遇上10年罕見嘅反勝車仔，實在開心過中六合彩（雖然部份出席人士確實響馬會贏咗些少派彩）；原因係，支持一隊弱旅，輸就應份，贏則過份。咁嘅心態實在好啱今時今日香港人，因為冇期望就冇失望囉。
只可惜大部份香港人都係強隊擁躉，獎盃捧少個都唔肯，莫講話要接受悲劇的災民身份；於是乎今晚凌晨又有一半人唔開心，今次唔知係輪到紅魔粉定係擁「藍」躉。
keyman
now TV主持
[email protected]