今日沙田有盛大國際賽事，英女皇都有一匹馬來港參賽，就係第八場香港盃嘅3號馬嘉登行宮（Carlton House），雖然女皇唔會御駕親征，但如果呢隻馬贏出，必成國際佳話。今日入馬場，既有重頭戲四場國際大賽，又有本地天王郭富城嘅「愛的呼喚」（二場11號）出戰，吸引大量傳媒入場，逼爆沙圈都似。
以往幾年，國際大賽由國泰航空贊助，國泰贊助有個好處，就是為人為己，國泰會幫手在海外宣傳，招攬賽馬旅遊團來港。不過今年國泰受油價影響，業績甚差，宣佈加薪2%，空中小姐隨時會在聖誕假期採取抗議行動，假如國泰繼續贊助賽馬嘅話，有啲難以說得過去，故此一早已經有意退出，適逢浪琴表要大展拳腳，聽講以更高價錢投得國際大賽贊助權，馬會一失一得，計過條數，笑得更開心。連到IHT都有大篇幅評論香港國際賽，指三月份杜拜世界盃，十二月香港國際賽，係每年賽馬之「開幕禮」與「閉幕禮」，全球馬壇注目，非到場不可。
浪琴表真係不惜工本，星期三在快活谷搵到郭富城做形像代言人，星期五晚在洲際酒店有盛大晚宴，使咁多錢，相信都係着眼中國市場啫，打好品牌等強國人來掃貨，咁就乜都返晒嚟！
至於英女皇隻馬可唔可以捧香港盃，機會好似少一啲，呢場國際一級賽（二千米）有兩隻法國名駒，1號天鷹翱翔係奪標大熱，可惜腳有事已退出，10號馬巴黎市郊（Saonais），出身寒微，當初出售價只係四千歐羅，點知到竟然贏咗一級大賽，成為馬壇傳奇，來港有力一爭，香港馬當然以上屆冠軍，2號加州萬里為首選。
第七場千六米香港一哩錦標係香港馬世界，1號雄心威龍係擂台躉，3號精彩日子可威脅，法國雌馬12號馴優馬（Siyouma）有力一爭，世界級大明星奧馬沙里夫有隻8號唐鮑思高，親自來港到場督師，不過賽績比較一般。第四場二千四百米香港瓶，係本地馬弱項，唔夠跑，墨爾本盃賽冠亞軍多利得（2號）與6號紅色禮物（馬主夏佳理） 再度碰頭，法國馬3號迂迴百轉（Meandre）亦不示弱。第五場千四米香港短途錦標幾乎係香港馬專利，1號天久與7號紅旗勇將一決雌雄，肥仔K刨日本馬經，日本方面話日本馬4號龍王係今年日本贏香港賽事之最佳希望喎。