無綫台慶頒獎禮舉行在即，一向熱捧無綫劇的周潤發（發哥）前晚出席新戲首映，大談心水視帝視后。原來發哥都有留意楊怡在《名媛望族》的被姦戲，並睇好她和黎耀祥封視后和視帝。問發哥可睇好《名》劇的劉松仁？他即說：「佢唔係（無綫）親生仔嚟嘛！」
周潤發、吳鎮宇、童菲、莫小棋及袁泉等，前晚在天際100出席電影《大上海》首映禮，腳傷缺席的黃曉明拍片支持，坐在輪椅的他笑言要向發哥的《縱橫四海》造型致敬，發哥笑說：「我哋《縱橫》有威吔，但佢冇。」發哥笑言已跑了三站首映，之後北京站留給曉明坐輪椅撐場。
睇好祥仔封視帝
消瘦不少的發哥表示要喼弗拍王晶的港產片，希望再減10磅，因謝霆鋒很瘦，預計下月中開工。提到無綫台慶頒獎禮將舉行，問發哥的視帝視后心水？他說：「大熱係祥仔（黎耀祥）同胡杏兒、楊怡，我睇楊怡後期多啲，珊珊（徐子珊）我返嚟就差唔多大結局，見佢吸毒都幾好。」
捧蘇基膺綠葉王
問發哥有否睇子珊的被姦戲？他陰陰笑說：「好少咋喎，好似楊怡仲長少少。」問他是否指楊怡咬劉松仁嘴唇那幕？發哥即笑說：「楊怡都有俾人強姦㗎。」
問發哥可睇好《名》劇的劉松仁封視帝？他心水清說：「好，但佢唔係親生仔嚟嘛。」那林峯是否有機會？他卻說：「祥仔唔係親生仔咩？」發哥又睇好蘇基（古明華）及三順（陳國邦）封最佳男配角，女配角則睇好江美儀，但發哥反問：「不過佢係咪親生女呀？」
提到曾志偉涉醉酒打人，發哥說：「佢成日都飲醉啦。」其後即被工作人員拉走。吳鎮宇近日與胡杏兒的fans在微博對罵，鎮宇說：「冇拗撬，好多人走嚟我度講好多嘢，去番自己地方，我想每篇文章乾淨啲。」
採訪：溫敏芝
攝影：仇志德
