【掌摑風波之嬉笑怒罵】曾志偉上周三跟徐淑敏（Suki）老公黃浩出席婚宴時發生爭拗，黃浩事後報警稱遭志偉摑了一巴。志偉昨晚為《歡樂滿東華2012》做司儀，昨午他返無綫做總綵排時，全程風騷爆燈，對於黃浩事件，志偉一概拒絕回應，但就向記者爆料指近日遭鄰居養的「食屎狗」騷擾，晚晚吠得厲害，令全邨人都睡不到。
徐淑敏老公黃浩的餐廳去年被LMF成員Kevin在微博數臭濫收費用，事件隔了一年多餘波未了，有指當時廂房內的閉路電視拍下有藝人疑似吸毒片段。捲入風波的徐濠縈前日獲老公陳奕迅（Eason）力撐，夫妻同心見記者，他們還發出聯合聲明，同時公開了當晚飯局內的多張照片，阿徐澄清自己沒吸毒習慣，更沒在飯局中吸食毒品。不過有指風波鬧大後，Eason曾向演藝人協會會長曾志偉求助，志偉上周三與黃浩夫婦不約而同出席落選港姐鄭嘉雯婚宴，其間兩男發生爭拗，黃浩事後報警指遭志偉摑了一巴，前晚他到中區警署落口供。
單拖到場笑容滿面
志偉昨午返無綫將軍澳電視城為晚上直播的無綫節目《歡樂滿東華2012》做準備，並開腔回應是非，他還抵死自爆近日受「食屎狗」滋擾。
志偉被黃浩報警指被他兜巴星，他前日臨時甩底《東華》拜神，志偉昨午3時出席節目總綵排時心情輕鬆，笑容滿臉，完全未有受連日是非影響，志偉單拖到來，身邊未見有助手或保鑣同行，看見記者也沒迴避，他表示因為遲到，答應先進廠報到才出來做訪問。
志偉稍後再現身當然被追問跟黃浩的爭執事件，他大方說：「一定係唔講得，因為有人報咗警，所以律師話，我哋唔可以講嗰晚啲嘢。」記者遂要求志偉轉講Eason，他又說：「人哋（指陳奕迅夫婦）都報咗警。」Eason避談曾求助演藝人協會，志偉也沒正面回答，他只說：「佢後尾做完記者會，有打畀我，佢去上海開騷，我返嚟綵排，各有各做。」
「其實隻狗睇唔到嘢」
對於近日是非不絕，志偉表示沒影響心情，但卻自爆近日受鄰居的狗滋擾，志偉說：「最近屋企後面有戶人養咗隻狗，晚晚吠，吠得好犀利，佢吠到成屋邨啲人都投訴，嘈得好緊要，個個瞓唔到，佢（狗主）話佢隻狗好犀利，見到有鬼有賊先至吠。我話我哋嗰度治安好好，唔會有賊有鬼，佢話一定有，如果冇，就係有內鬼。」
志偉越講越興奮，他續說：「我哋就好奇怪，所以前晚我特登好得閒，喺屋企開晒燈，又冇賊，又冇鬼，佢先至拉番隻狗走，佢話其實佢隻狗睇唔到嘢㗎，乜都睇唔到。佢隻狗生『癩痢』，我話咁鬼核突，攞走佢啦。」志偉講到這裏，全場記者已哄堂大笑，有記者追問那隻「癩痢狗」可有吐口水？志偉立即笑着回答：「哈哈哈哈﹗佢解釋養嚟做乜，佢話隻狗唔使食狗糧、食飯，淨係食屎㗎咋﹗咁大家都原諒佢啦！我呢幾日咪遲咗嚟。」志偉講完「食屎狗」的故事，他再加一句：「係咁，交代晒，好好㗎啦。」
黃浩：我唔回應
黃浩上周三報案被志偉摑一巴，當晚他以酒醉為由改為前晚才往落口供，事後接受記者訪問又前言不對後語指沒看過藝人疑似吸毒片段。對於志偉寸爆的「食屎狗」言論，記者昨日致電黃浩，他說：「我唔回應。」
此外，徐濠縈代表律師前日現身灣仔警察總部，聲稱就懷疑有食肆濫收費用和有人利用錄影帶勒索事報警，但其後警方指姓其律師是代表姓陳女子及姓徐女子就去年灣仔區一食店發生的刑事恐嚇案提供資料，警方並已要求該律師聯絡有關事主就事件直接向警方提供資料，據悉有關人士這一、兩天要到警署提供資料。阿徐前日在facebook留言：「謠言止於智者！」Eason昨晚則在上海開騷，他前日也在facebook留言：「希望大家不要再作胡亂猜測。」
採訪、攝影：何慧斯、陳順禎
