45歲的葉玉卿回流返港拍電影，令大家有機會重新認識這位傳奇女子，退出娛樂圈16年，由三級片女星變身成億萬富婆，昔日的風情減淡，但坦誠依舊，卿卿不介意讓子女知道自己曾拍三級片。大女芷欣不捨暫別母親，哭着來港陪伴卿卿，這一日拍照，看卿卿摟着女兒錫，真的很窩心！
撰文：羅美倫
葉玉卿96年退出娛樂圈，兩年後下嫁美國華裔商人胡兆明成億萬富婆，但她留低的作品如三級片《卿本佳人》、《我為卿狂》、名曲《擋不住的風情》令人難忘，16年後重返娛圈客串賀歲電影，卿卿本以為回來做個散工、路人甲，但卿卿甫落機已感壓力，一度令她緊張，她笑說：「返嚟就有人彈，乜咁嘅樣㗎，out啦佢，邊個冇後生過吖，又有人會話Hermès袋都冇要用Burberry，其實我最主要返嚟探媽咪，咁啱吳君如講開拍戲又講番起啲癮，所以最輕便咁返嚟，不過唔會唔開心，任何事只要畀48小時我，過咗就冇事，我會當每一日都係最後一日，要好好珍惜，善用時間。」
過戲癮被老公哦
卿卿坦言以前有太多物質枷鎖，最初到美國時試過入Chanel買幾萬美金靚衫，結果半年一套都沒穿過，甚至沒機會着，漸漸也發覺根本沒有人在意。今次為過戲癮，卿卿被老公日哦夜哦，不想太太辛苦之餘，更怕惹來閒言，卿卿說：「老公最怕我出嚟拍戲畀人話經濟唔掂，養我唔起，但我返嚟拍八日戲，冇可能啦，唔掂返出嚟拍唔可能救到成個屋企，而且佢又冇唔掂，的確過去幾年美國經濟唔係幾好，係有啲影響，但我哋一樣有銀行、超市，順便澄清我冇80億身家呀。」
在紐約卿卿24小時貼身照顧老公及三個子女的起居飲食，每日勞心勞力：「塊地十二畝，我就好似經理咁，要管理所有嘢，水電、維修乜都關事，好攰㗎！雪櫃都有八個，壞一個都要搵張單修理，今次返嚟可以暫時放低家庭、子女嘅壓力，等個腦同膊頭唞一唞。」
向子女坦白過去
卿卿13歲的大女兒胡芷欣（Victoria）不捨母親，最終請假緊隨她返港，女兒開心的同時，卿卿一樣窩心，她說：「Victoria最開心我每日去接放學，以前屋企有四個保母，囡囡唔愛保母，家得兩個，老公成日話我做乜咁辛苦，其實呢啲就係我以後嘅回憶，我同老公講佢錯過咗好多。」親力親為照顧家人是卿卿的開心泉源，活得自在才最幸福。
除了13歲女兒，卿卿的兩個兒子胡可聰、胡以聰分別11歲及9歲，日漸長大，他們是否知道媽咪昔日曾拍過三級片？卿卿坦言：「我唔介意，一定要話畀佢哋知我拍過乜嘢片，家兒童不宜唔畀佢哋睇住，但呃唔到人啦，網上都搜尋到，我唔會俾外面嘅嘢影響到，我家都仲同9歲細仔沖涼，唔會用猥瑣嘅心睇，以前我係商品，只想要noise，要搵食嘛。」
卿卿覺得沒有甚麼事需要隱瞞，她教導子女，任何人都會做錯事，但必須誠實坦白，尤其對家人不能講大話：「善意嘅謊言可以接受，我同小朋友講，無論你犯幾多錯，都唔會改變我對你嘅愛，而且我當時唔係錯，係一條路，好聽嘅叫性感，其實我係暴露，我當自己係一件商品咁去推銷。」
離婚不會分身家
卿卿承受過生活壓力，開始懂得放鬆，她希望老公少做多休息，以往卿卿有份做董事的工作，早已漸漸淡出，寧多花時間照顧子女，卿卿笑言：「有朋友叫我小心老公會去滾，我話美國好公平，我哋報稅都一齊報，走唔甩，我同老公講，完全唔使驚離婚我要分身家，美國離婚爭拗只會搞散個家同事業，最後益晒律師，當日我帶幾多嚟，計番通脹就帶番咁多走，一個人使得幾多吖，我以前返亞視都係坐小巴，Hermès大袋我只得兩個，係有應酬至有需要。」
不一定過奢華生活，卿卿真的會再返港過拍劇生涯嗎？她坦言要先消化今次拍電影的成果，她鬼馬的說：「唔會唔考慮，睇吓自己應唔應付得嚟啦，拍劇辛苦，我咁嘅年紀捱唔到，老公實鬧，哈哈哈……離婚後至諗啦！除非每日有八個鐘瞓覺，兩個鐘化妝落妝，但相信好難囉。」
